Sosiaal

Nories hou van alles wat lekker is, van geesvang tot groot pret

Die sosiale kalender by Noordheuwel is stampvol en baie geleenthede word op formele sowel as informele vlak gereël om aan elke Norie se smaak te voldoen. Sosiale ontwikkeling word ook beskou as 'n baie belangrike komponent van die leerders se ontwikkeling en daarom word verskeie geleenthede en funksies gereël om aan hierdie behoefte van tieners te voldoen.

• Gr 8-groentjiekonsert
• Valentynsbal
• Gr 8-kamp (Persoonsontwikkeling)
• Gr 10-avontuurkamp
• Pretdae soos Lentedag en Loslitdag
• Lentebal
• Uitreikaksies na die gemeenskap
• Mnr en Mej Norie
• Matriekafskeid

Gemeenskapsprojekte

Nories se Harte is vol Liefde

"Dankie, Hoërskool Noordheuwel, vir die wonderlike gebaar. Ons kinders by Huis Nehemiah slaap vanaand warm, omdat julle harte so warm klop vir ons. Julle hulp beteken die wêreld vir ons, veral omdat ons geen staatsbefondsing kry nie en 100% staatmaak op privaat donasies om ons werk voort te sit nie."

– Kyle Tolman, HUB van Cross Connect

Nories het orgideë en blou Energades vir onkologiesentrums uitgedeel. Bejaardes is bederf met 'n pakkie vol eet- of badgoed. Nories gee ook om vir diere en ons het komberse en kos vir FORA en 9th Day geskenk. Nories maak graag 'n verskil in die gemeenskap!

Groenspan

Die Groenspan is 'n volhoubaarheidsgroep wat poog om 'n impak in ons omgewing en in die natuur te maak. Ons is betrokke by vele projekte, soos die skoonmaak van die Botaniese Tuin se rivier, die uithaal van uitheemse boomspesies en die aanplant van bome.

Ons het ook 'n herwinningskomponent waar ons papier herwin en daardie inkomste word gebruik vir ons eie groentetuin. Die opbrengs daarvan word weer geskenk aan behoeftiges in die gemeenskap.

Enige leerder met die regte ingesteldheid en genoeg moed om 'n verskil te maak, kan deel wees van hierdie groep.